பிடிசார் – திரைவிமர்சனம்

அம்மாவின் பேச்சைக் கேட்டு எந்த வம்புக்கும் செல்லாத தமிழ் சினிமாவின் வழக்கமான ஹீரோ ஹிப் ஆப் ஆதி. ஈரோட்டில் உள்ள தனியார் பள்ளியில் உடற்கல்வி ஆசிரியராக பணியாற்றுகிறார். அந்தப் பள்ளியின் ஆங்கில ஆசிரியர் வானதியை (காஷ்மீரா) காதலிக்கிறார். ஆரம்பத்தில் ஒருதலையான காதல், நாயகனின் தொடர் முயற்சியால் காதல் கை கூடி இருவீட்டார் சம்மதத்துடன் திருமணத்துக்கான பணிகள் தொடங்க, இடையில் நிகழும் நிகழும் பிரச்சினையால் அமைதியான ஆதி வெகுண்டெழ வேண்டிய நிர்பந்தத்துக்கு தள்ளப்பட்டு, நீதிக்கான போராட்டத்தில் இறங்குகிறார். அது என்ன போராட்டம்? அதில் வெற்றி கிடைத்ததா என்பதுதான் படத்தின் ஒருவரி திரைக்கதை.

‘கிளப்புல மப்புல திரியிற பொம்பள’ என்ற ஆல்பம் பாடலில் கவனம் பெற்ற ஹிப் ஆப்ஆதி, அங்கிருந்து பல மைல்கள் நகர்ந்து பெண்களுக்கெதிரான பாலியல் துன்புறுத்தல்களை பேசும் படத்தில் நடித்திருப்பது  பாராட்டுதலுக்குரியது. அதிலும் பெண்களின் ஆடை, அவர்கள் மீதான அத்துமீறல்களுக்கு காரணமில்லை என்ற இடம் கவனிக்க வைக்கிறது.கோவை பேச்சு, மேஜிக் வால் ஐடியா, ‘இது ஆக்‌ஷன் மேடம்’ என்ற வைரல் நிகழ்ச்சியை நுழைத்தது, மாணவர்களுடன் ஆதி செய்யும் கலாட்டா, தந்தையின் அட்டகாசம், கூடவே ஹீரோயிசம், பாடல், காதல், சண்டை என்ற கமர்ஷியல் எல்லைக்குள் அழுத்தமான கருவை நுழைத்து பேசியிருக்கிறார் இயக்குநர் கார்த்திக் வேணுகோபாலன்.