திரு.மாணிக்கம் – திரைப்பட விமர்சனம்

சூதாட்ட தொழிலில் இருந்தாலும் நேர்மையை கடைபிடிக்கும் எளிய மனிதனின் நேர்மை படும் பாட்டையும், அதைக் காப்பதற்கான அவனின் போராட்டமும் தான் ‘திரு.மாணிக்கம்’. திரைப்படம்.கேரள மாநிலம் குமுளியில் லாட்டரி கடையோடு சிறிய புத்தகக் கடையும் நடத்திவரும் மாணிக்கம் (சமுத்திரக்கனி), தன் மனைவி (அனன்யா), இரண்டு மகள்கள், மனைவியின் தம்பி, மாமியார் ஆகியோருடன் வாழ்ந்து வருகிறார். இரண்டாவது குழந்தைக்குப் பேச்சுத்திறன் சவால் இருப்பதனால் அவருக்கான மருத்துவச் செலவு, கடையை வேறு இடத்திற்கு மாற்றுவதற்கான செலவு, மனைவியின் தம்பியை வெளிநாட்டிற்கு அனுப்புவதற்கான செலவு எனப் பல பொருளாதார நெருக்கடியில் வாழ்கிறார்.
இந்நிலையில், ஊர், பெயர் தெரியாத முதியவர் ஒருவர் (பாரதிராஜா), பல லாட்டரி சீட்டுக்களைவாங்குகிறார். ஆனால், கையிலிருந்த பணம் தொலைந்துவிட்டதால், நாளை பணம் கொடுத்து வாங்கிக் கொள்வதாகவும், அதுவரை லாட்டரி சீட்டைபத்திரமாக வைத்திருக்க வேண்டும் எனவும் சொல்லிவிட்டுச் செல்கிறார். எதிர்பாராத வகையில்அந்த லாட்டரி சீட்டு ஒன்றுக்கு ஒன்றரை கோடி பரிசு விழுகிறது.

இப்போது அந்த லாட்டரி சீட்டுஅந்தப் பெரியவருக்குச் சொந்தமா, அவர் பணமே கொடுக்காததால் கடைக்காரரான சமுத்திரக்கனிக்கே சொந்தமா என்ற குழப்பம் உண்டாகிறது. அதைத் தொடர்ந்து மாணிக்கம் எடுக்கும் முடிவு என்ன, அவரின் குடும்ப உறுப்பினர்கள் நிர்ப்பந்திப்பது என்ன என்பதை மெலோ டிராமாவாகத் தந்திருக்கிறார் இயக்குநர் நந்தா பெரியசாமி.

நேர்மை, தெளிவு, பக்குவம், பொறுப்பு, அன்பு என  கதாபாத்திரத்தைத் தன் அனுபவ நடிப்பால், பார்வையாளர்களுக்கு நெருக்கமாக்கியிருக்கிறார்  சமுத்திரக்கனி.அமைதியான பெண்ணாகவும், பொறுப்பான அம்மாவாகவும் வந்தாலும், தேவையான இடங்களில் தேவையான அவதாரங்களையும் எடுத்து, படத்திற்கு வலுசேர்த்திருக்கிறார் அனன்யா. கோபத்தையும், ஆற்றாமையையும் ஒரே சேர மனதிற்குள் குமைந்துகொள்ளும் இடத்தில் தன் கதாபாத்திரத்தையும் ஆழமாக்கியிருக்கிறார் அனன்யா. முதுமையின் நடுக்கம், வெகுளித்தனம், வைராக்கியம் போன்றவற்றை தன் உடல்மொழியால் கொண்டுவந்து, அசரடிக்கிறார் பாரதிராஜா.