அன்பிற்கினியாள் – சிறப்பு பார்வை

மலையாள ‘ஹெலன்’ படத்தை தமிழில் ‘அன்பிற்கினியாள்’ என்ற பெயரில் உருவாக்கியிருக்கிறார்கள்.

படத்தின் மிகப்பெரிய பலமாக இருக்கிறார் நாயகி கீர்த்திபாண்டியன். துறுதுறுப்பாக ஓடியாடும் பெண்ணாகவும் எதிர்பாராமல் காவல்நிலையத்தில் அப்பாவைப் பார்க்க வேண்டிய நேரத்தில் உடல்மொழியிலேயே பயத்தையும் பதட்டத்தையும் வெளிப்படுத்துவதிலும், உயிராபத்து ஏற்படும் சூழலில் மாட்டிக்கொண்ட நிலையிலும் அதை எதிர்த்துப் போரிடும் போர்க்குணத்திலும் தேர்ந்த நடிகை போல் மின்னுகிறார்.
காதலனாக நடித்திருக்கும் பிரவீன்ராஜா அமைதியாக வந்துபோகிறார்.பதட்டமான காட்சிகளிலும் இயல்பாக இருக்கிறார். காவல்துறை உதவி ஆய்வாளராக நடித்திருக்கும் ரவீந்திர விஜய் கவனிக்க வைக்கிறார்.
தலைமைக்காவலர், வணிக வளாகக் காவல்காரர் உட்பட சின்னச் சின்ன வேடங்களில் நடித்திருப்பவர்களும் கதைக்களத்துக்குப் பலம் சேர்த்திருக்கிறார்கள்.
ஜாவித் ரியாஸின் இசையில் பாடல்கள் மனதை வருடுகின்றன. பின்னணி இசை படபடப்பை ஏற்படுத்துகிறது.
மகேஷ்முத்துசாமியின் ஒளிப்பதிவு நன்று. குறிப்பாக இரண்டாம் பாதிக் காட்சிகளில் அவர்தான் நாயகன் என்றால் மிகையாகாது. அவ்வளவு நேர்த்தி.இயக்குநர் கோகுல் இதுபோன்ற மென்மையான படங்களையும் பக்கா வியாபாரப் படங்களுக்கேயுரிய வேகத்துடன் கொடுத்திருக்கிறார். ஒரு காட்சியில் நடித்து வரவேற்பும் பெறுகிறார்.
ஒரு அப்பா மகள் கொண்ட மிகச்சிறிய குடும்பத்தை வைத்துக்கொண்டு, குடும்ப உறவுகள் எப்படியிருக்கவேண்டும், கூன் விழுந்து நடக்கும் ஒட்டுமொத்த சமுதாயத்துக்குமான நல்ல செய்தி, தூயஅன்பின் முன்னால் சாதி, மதம் மற்றும் அதிகாரம் ஆகியன அடங்கிப்போகும் உள்ளிட்ட பல பெரிய விசயங்களை பரப்புரை செய்யாமல் கதையோட்டத்திலேயே செவிட்டில் அறைகிற மாதிரி சொல்லியிருக்கும் படம்அன்பிற்கினியாள்