கல்லா கட்டிய தி டார்க் ஹெவன்

டி3 பட இயக்குநர் பாலாஜி இயக்கத்தில் உருவாகி அண்மையில் வெளியான க்ரைம் த்ரில்லர் திரைப்படம்’தி டார்க் ஹெவன்’.இப்படத்தில் பிக்பாஸ் புகழ் நட்சத்திரங்கள் சித்து,தர்ஷிகா, ரித்விகா ஆகியோருடன்,பிரதீப்,வேலராமமூர்த்தி,நிழல்கள் ரவி,ஜெயக்குமார்,அருள் டி சங்கர்,சத்தியா,சாப்ளின் பாலு,கோபால்,ஆர்த்தி மற்றும் பலர் நடித்திருந்தனர்.

இப்படத்துக்கு ஒளிப்பதிவு மணிகண்டன்.பிகே,படத்தொகுப்பு ராஜா ஆறுமுகம்,இசை சக்தி பாலாஜி.இந்தப்படத்தை கோதை என்டர்டெயின்மென்ட் மற்றும் எம்எஸ் ஸ்விஸ் ஃபிலிம் ஃபேக்டரி ஆகிய நிறுவனங்கள் தயாரித்திருந்தன.

சமீபத்தில் வெளிவந்த படங்களில் வித்தியாசமான க்ரைம் த்ரில்லர் என்று பெயர் பெற்று ஊடகங்களால் பெரிதும் பாராட்டப்பட்ட இந்த ‘தி டார்க் ஹெவன்’ இரசிகர்களின் வரவேற்பையும் பெற்று இன்று பெரிய வெற்றி பெற்றுள்ளது.இது சிறுமுதலீட்டுப் படத்தயாரிப்பாளர்கள் மத்தியில் பெரியநம்பிக்கை வெளிச்சத்தைக் கொடுத்திருக்கிறது.படத்துக்குக் கிடைத்திருக்கும் வரவேற்பினைத் தொடர்ந்து திரையரங்குகளின் எண்ணிக்கை அதிகமாக்கப்பட்டு வெற்றிப்பாதையில் சென்று கொண்டிருக்கிறது.

இந்த வெற்றி மகிழ்ச்சியை முன்னிட்டு படக்குழுவினர் ஊடகங்களைச் சந்தித்து நன்றி தெரிவிக்கும் வகையில்’எங்களின் இந்த மாபெரும் வெற்றிக்கு உறுதுணையாக இருந்த பத்திரிகையாளர்களுக்கு மனமார்ந்த நன்றிகள்’ என்ற பதாகையுடன் தங்கள் மகிழ்ச்சியையும் நன்றியையும் பகிர்ந்து கொண்டார்கள்.இந்தச் சந்திப்பில் படத்தின் ஒளிப்பதிவாளர் மணிகண்டன் பிகே,தயாரிப்பாளர்கள் ஷரண், கோபால்,இசையமைப்பாளர் சக்தி பாலாஜி,நடிப்புக்கலைஞர்கள் வேல ராமமூர்த்தி,ஜெயக்குமார்,ஆர்த்தி,சுமித்ரா,பிரதீப்,விவேக், செல்வா,மனோஜ்,அலெக்ஸ்,டேனி ஆகியோரும் கலந்துகொண்டனர்.

செப்டம்பர் 22 அன்று சென்னை பிரசாத் லேபில் பத்திரிகையாளர்களுக்கு நன்றி தெரிவிக்கும் இந்தச் சந்திப்பு நடைபெற்றது.

சந்திப்பில் தயாரிப்பாளர் ஜி.தனஞ்ஜெயன் கலந்து கொண்டு பேசும்போது….

முதலில் இந்தப்படத்தின் இயக்குநருக்கும் தயாரிப்பாளருக்கும் எனது வாழ்த்துகள்.இந்தப்படம் வெளியாவதற்கு ஆறுமாதத்திற்கு முன்பு நான் பார்த்தேன்.பார்த்தவுடன் இயக்குநர் பாலாஜியிடம் படம் நல்ல த்ரில்லராக வந்திருக்கிறது.சரியான தேதியில் வெளியிட்டால் படத்திற்கு நல்லவரவேற்பு கிடைக்கும் என்று கூறினேன்.இந்தக் தேதியைக் குறிப்பிட்டபோது நான் பாலாஜியிடம் கேட்டேன் ”இந்தத் தேதி சரியானதுதானா?அன்றைக்கு ஒன்பது படங்கள் வருகின்றன.ஏற்கெனவே ‘மண்டாடி’ நன்றாக ஓடிக்கொண்டிருக்கிறது” என்றேன்.அப்போது அவர்”இல்லை சார் இந்தத்தேதியை முடிவு செய்துவிட்டோம் அதற்குக் கொண்டு வருகிறோம்” என்றார்.ஒன்பது படங்களுக்கு மத்தியில் இந்தப்படம் வெற்றிகரமாக ஓடிக்கொண்டிருக்கிறது.அதற்கு ஊடகங்கள் கொடுத்த ஆதரவும் பார்வையாளர்கள் கொடுத்த ஆதரவும்தான் காரணம்.எனது வாழ்த்துகள்.இதை ஒரு மிகப்பெரிய வெற்றியாக நான் பார்க்கிறேன்.இத்தனை படங்கள் நடுவில் மக்கள் பெரியபடங்களைத்தான் பார்ப்போம்.பெரிய நட்சத்திர நடிகர் நடித்த படங்களைத்தான் பார்ப்போம் என்றிருக்கிற சூழலில் இந்தப்படத்திற்குக் கிடைத்திருக்கும் வெற்றி என்பது கொண்டாடப்பட வேண்டிய வெற்றிதான்.ஒரு திரைப்படம் எடுக்கும்போது ஒரு நடிகர் ஒத்துழைப்பு கொடுக்கவில்லை என்றால் எவ்வளவு பிரச்சினைகளை அந்தப்படம் சந்திக்குமோ அத்தனையையும் இந்தப்படம் சந்தித்திருக்கிறது.அதுவும் அறுபது,எழுபது சதவீதம் படப்பிடிப்பு முடிந்தபிறகு அந்த நடிகருடன் தொடர்ந்து போகமுடியவில்லை என்று தயாரிப்பாளரும் இயக்குநரும் முடிவு செய்து நிறுத்திவிடுவோம் என்று முடிவு எடுப்பது யாரும் சுலபமாக எடுக்கமுடியாது.சிலவருடங்களுக்கு முன்பு எனக்கும் அப்படித்தான் நடந்தது.ஒரு பெரியநடிகருடன் பிரச்சினைகளால் அந்தப்படத்தை முடிக்க முடியாமல் திணறினேன்.படங்கள் வளர்ந்த பிறகு,செலவு செய்த பிறகு எங்களால் அப்படி ஒரு முடிவு ஒன்று எடுக்க முடியவில்லை.படத்துக்காக நீண்டதூரம் வந்துவிட்டோம்,நிறைய செலவாகிவிட்டது என்று தயங்கினோம்.அப்படிப்பட்ட நிலையில் படத்தை நிறுத்திவிட்டு வேறு படம் எடுப்பது சாதாரண விஷயம் அல்ல.அது தெரிந்து சித்து ஈடுபாட்டுடன் நடிக்க வந்தது பாராட்டுக்குரியது.அவரது நடிப்பு பிரமிப்பாக இருக்கிறது.இன்று திரையரங்குகளில் நல்ல ரெஸ்பான்ஸ் கிடைத்திருக்கிறது.நடிகர்கள் நடிக்க ஒப்புக்கொள்ளும்போது எல்லாவற்றையும் சரியாகப் பேசிக்கொண்டு ஒப்பந்தம் செய்யவேண்டும்.பிறகு முழு ஒத்துழைப்பு கொடுக்க வேண்டும்.இல்லாவிட்டால் வாய்ப்பு இல்லாமல் இருக்க வேண்டியதுதான்.சில சமயம் வாரத்திற்கு ஆறேழு படங்கள் வருகின்றன.சில வாரம் எதுவுமே வருவதில்லை.இதை முறைப்படுத்த வேண்டும்.அடுத்தவாரம் கூட ஆறுபடங்கள் வருகின்றன.மூன்று படங்கள் முக்கியமான படங்களுக்குக் கூட திரையரங்குகள் கிடைக்கவில்லை.வாரத்திற்கு நான்கைந்து படங்களுக்கு மேல் வரக்கூடாது. எல்லாவற்றையும் மீறி இந்தப்படம் வரவேற்பு பெற்றுள்ளது மகிழ்ச்சியாக இருக்கிறது.இந்தப்படத்திற்கு பிவிஆர் சினிமா கொடுத்த ஆதரவு பெரிய விசயம்.அவர்கள் சிறுமுதலீட்டுப் படங்களுக்கும் வாராவாரம் திரையரங்குகள் தரவேண்டும்.படக்குழுவினருக்கு வாழ்த்துகள் என்றார்.

இயக்குநர் பாலாஜி பேசும்போது….

இது உண்மையிலேயே ஒரு உணர்ச்சிகரமான தருணம்.இப்போதும் அந்த அறுபது -எழுபது சதவீத படத்தை எடுத்துவிட்டுத் தூக்கிப்போட்டது என் கண்ணுக்குள்ளேயே இருக்கிறது.இந்தப்படம் வருவதற்கு இந்தத் தயாரிப்பாளர்கள் இருவர் முக்கியமானவர்கள். சகோதரர் ஷரண்,கோபால் சார் இவர்கள் முக்கியமானவர்கள்.அதையும்தாண்டி என் மனைவி,என் சகோதரர்,குடும்பத்தினர்,நண்பர்கள் என என் குழுவினர் உட்பட பலரும் பெரிய பக்கபலமாக இருந்தார்கள்.அதையும்தாண்டி பலரும் எனக்கு உதவியாக இருந்திருக்கிறார்கள்.மீண்டும் ஒருபடத்தைத் தொடங்குவதற்கு எனது குழுவினர் எனக்குப் பெரியபலமாக இருந்தார்கள்.வேல ராமமூர்த்தி சார்,ஜெயக்குமார் சார் எனக்குத் துணையாக இருந்திருக்கிறார்கள்.சிந்து,ரித்விகா மேம்,தர்ஷிகா மேம் நீண்டநாட்கள் என்னுடன் படப்பிடிப்பில் இருந்திருக்கிறார்கள்.அப்போதெல்லாம் 18 மணி நேரம் கூட வேலை செய்திருக்கிறார்கள்.சித்து என்னுடனே மினி டூர் போல வந்துகொண்டே இருந்தார்.என்னுடைய ஒளிப்பதிவாளர் மணிகண்டன்,அவருக்கு பெரிய நன்றி.என் முதல்படத்திற்கும் எனது அடுத்த படத்திற்கும் அவர்தான் ஒளிப்பதிவாளர்.எங்களுக்குள் கருத்து வேறுபாடு வரும்,ஆனால் எதையும் வெளிப்படையாகப் பேசிக்கொள்ளலாம்.சண்டை போட்டாலும் உடனே மறந்துவிட்டு டீ சாப்பிடக் கூப்பிட்டால் வருவார்.அப்படிப்பட்டவர்தான் எடிட்டர் ராஜா ஆறுமுகமும்.ஒரு படம் எடுத்து முடிக்கப்பட்டதை ஏற்கெனவே ஒரு நடிகரை வைத்து எடுத்த படத்தில் தேவையற்றதைத் தூக்கிவிட்டுத் தேவையானதை எடுத்து மீண்டும் எடுக்கப்பட்டதோடு சேர்த்துக்கொண்டு வருவது என்பது சாதாரண விசயம் அல்ல.அது சுலபமானது கிடையாது.அவர் செய்தார்.அவருக்கு நன்றி.மூன்றாவது நபராக வந்து எனது குடும்பத்தில் ஒருவராக மாறியிருக்கிறார் இசையமைப்பாளர் சக்தி பாலாஜி.இந்தப்படம் வந்தால் மூன்று பேருக்கு நல்லபெயர் கிடைக்கும் என்று நான் அப்போதே சொன்னேன். ஒளிப்பதிவாளர்,இசையமைப்பாளர்,எடிட்டர் அதற்குப்பிறகுதான் இயக்குநர் யார் என்று கேட்பார்கள் என்று சொன்னேன்.அதுதான் இன்று நடந்திருக்கிறது.சக்தி பாலாஜியின் இசையைப் பற்றிப் பலரும் பேசும்போது எனக்கு மிகவும் மகிழ்ச்சியாகவும் பெருமையாக இருக்கிறது.என் இதயத்திலிருந்து சொல்கிறேன் அவர் பெரியஆளாக வருவார்.சகோதரர் ஷரண்,கோபால் சார் இல்லாமல் இந்தப்படம் இல்லை.இந்த மேடையும் இல்லை.சிலருக்கு இந்தப்படம் வருமா வராதா என்ற சந்தேகம் இருந்தாலும் பலரும் நம்பிக்கையோடு உழைத்தார்கள்.எல்லாருமே வெற்றிக்காகப் பாடுபட்டார்கள்.படம் வெற்றிகரமாக போய்க்கொண்டிருக்கும்போது பழைய சர்ச்சைகளுக்குள் எல்லாம் நான் போகவிரும்பவில்லை.இப்போதைய சந்திப்பு வழக்கமான சக்சஸ் மீட் போல் நடைபெறுவதாக யாரும் சொல்லக்கூடாது என்று நினைத்தேன்.தயாரிப்பாளர் கோபால் சார் தான் வைக்கவேண்டும் என்றார்.இதை ஏற்பாடு செய்தோம்.இது ஊடகங்களுக்கு நன்றி தெரிவிக்கும் சந்திப்புதான்.விரைவில் பெரிய வெற்றி வசூல் விவரங்களுடன் உங்களைச் சந்திக்கிறோம்.பத்திரிகையாளர் காட்சியில் நீங்கள் கொடுத்த கைதட்டல் தான் திரையரங்குவரை நீண்டு சென்றிருக்கிறது என்பது பெரிய மகிழ்ச்சி.அனைவருக்கும் நன்றி என்றார்.