சீதாராமம் வெளியீட்டு தேதி அறிவிப்பு

தெலுங்கில்நான்கு வருடங்களுக்கு முன்பு வெளியான மகாநடி படத்தின் மூலம் தெலுங்கில் அறிமுகமான துல்கர் சல்மான் தற்போது சீதாராமம் என்கிற தெலுங்கு படத்தில் நடித்து முடித்து விட்டார்.இயக்குனர் ஹனு ராகவபுடி என்பவர் இயக்கும் இந்த படத்தில் கதாநாயகியாக மிருணாள் தாக்கூர் நடிக்க, முக்கியமான வேடத்தில் ராஷ்மிகா மந்தனா நடித்துள்ளார்.

மேலும், கௌதம் மேனன், பிரகாஷ் ராஜ், தருண் பாஸ்கர், சத்ரு, பூமிகா சாவ்லா, ருக்மணி விஜய் குமார், சச்சின் கெடேகர், முரளி சர்மா, வெண்ணெலா கிஷோர் மற்றும் பலர் நடித்துள்ளனர்.படத்தின் இசை பாடல் குறித்த முன்னோட்ட  விளம்பரங்கள் சமீபத்தில்  தயாரிப்பு தரப்பில் வெளியிடப்பட்டன. சமீபத்தில் வெளியிடப்பட்ட முதல் சிங்கிளான ‘ஓ சீதா ஹே ராமா’ என்ற மெல்லிசையில் உருவான காதல் பாடல், இசை விரும்பிகளை மயக்கியது. இந்தப் பாடல் வெளியான சிறிது நேரத்தில், சார்ட் பஸ்டர் ஆனது. இப்போது ஆல்பத்தின் அடுத்தடுத்த பாடல்களுக்கு ரசிகர்களிடம் பெரும் எதிர்பார்ப்பு  நிலவுகிறது.

படத்தின் முன்னோட்டத்தின் மூலம் ரசிகர்களிடம் பெரும் பரபரப்பை ஏற்படுத்திய தயாரிப்பாளர்கள் தற்போது படத்தின் வெளியீட்டு தேதியையும் வெளியிட்டுள்ளனர்.
இந்த ‘சீதா ராமம்’ திரைப்படம் வரும் ஆகஸ்ட் 5-ம் தேதி  தமிழ், தெலுங்கு, மலையாளம் ஆகிய மொழிகளில் ஒரே நேரத்தில் வெளியாகவுள்ளது.

இந்த படத்தில் லெப்டினன்ட் ராம் என்கிற ராணுவ அதிகாரி கதாபாத்திரத்தில் துல்கர் சல்மான் நடித்துள்ளார். போர் பதற்றம் நிறைந்த எல்லையில் இருக்கும் ஒரு ராணுவ வீரருக்கும் இளம் பெண்ணுக்கும் ஏற்படும் காதலை மையப்படுத்தி இந்தப்படம் உருவாகியுள்ளது