மாஸ்டர் டிரைலர் ரிலீஸ் எப்போது

 மார்ச் 21ஆம் தேதி இரவு மாஸ்டர் படத்தின் டிரெய்லரை வெளியிடத் திட்டமிட்டுள்ளனர். டிரெய்லரிலேயே அதிகாரபூர்வமான ரிலீஸ் தேதியையும் அறிவிப்பது விஜய் படங்களின் வழக்கம். அதுபோலவே, ஏப்ரல் 9ஆம் தேதி மாஸ்டர் படத்தை ரிலீஸ் செய்யும் தகவலை டிரெய்லரில் சேர்த்துவிட முடிவெடுத்திருந்தது படக்குழு.

ஆனால், கொரோனா வைரஸ் பாதிப்பிலிருந்து மக்களைக் காப்பாற்றும் முன்னெச்சரிக்கை நடவடிக்கையாகத் திரையரங்கங்கள் உள்ளிட்ட பல கமர்ஷியல் இடங்களை மார்ச் 31ஆம் தேதி வரை மூடச் சொல்லி உத்தரவிட்டிருக்கிறது தமிழக அரசு.

ஒருவேளை கொரோனா பாதிப்பு மோசமாகி மார்ச் 31ஆம் தேதிக்குப் பிறகும் தியேட்டர்களை மூடவேண்டிய சூழல் ஏற்பட்டால், ஏப்ரல் 9ஆம் தேதி ரிலீஸாகும் மாஸ்டர் படத்துக்குப் பிரச்சினையாகும்.

ரிலீஸ் தேதியை அறிவித்துவிட்டு பிறகு தேதியை மாற்றினாலும் தேவையில்லாத செலவுகள் அதிகம் ஏற்படும். எனவே, விஜய் படங்களின் வழக்கத்தை மாற்றி மாஸ்டர் படத்தை ரிலீஸ் செய்யலாம் என ஒரு யோசனையை விஜய்க்கு வழங்கியிருக்கிறது படக்குழு.

படக்குழுவினரின் தற்போதைய திட்டப்படி, மார்ச் 21ஆம் தேதி இரவு மாஸ்டர் படத்தின் டீசரையும், அதன்பிறகு மார்ச் 31 வரை சில பாடல் வீடியோக்களையும் ரிலீஸ் செய்துவிட்டு, மார்ச் 31க்குப் பிறகு சூழல் எப்படி மாறுகிறது என்பதைப் பார்த்துவிட்டுப் படத்தின் ரிலீஸ் தேதி அறிவிப்பைப் பார்த்துக்கொள்ளலாம் என்று சொல்லப்பட்டிருக்கிறது. இதற்கும் முழு விருப்பமில்லாமல் தலையாட்டியிருக்கிறார் விஜய். எனவே, டிரெய்லர் ரிலீஸ் இப்போதைக்கு நடைபெறுவது சந்தேகம்தான் என்கின்றனர் படக்குழுவினர்.